洗錢扮靚 WHY NOT?

女人的消費項目之多，單在臉上肯定過百款，一生的消費過百萬也不為奇。

男神黃子華的名言中，我最喜愛的其中一段，是某些女士的化妝有如喬裝，實在太食字又到位。男士無一不拍掌與歡呼起哄，而在場不少女士都有偷笑，相信九成九於當天都有化妝吧！但是她們依然故我，精神奕奕的臉蛋掛上自信的眼神，向男士們報以微笑。沒錯，理論上，內在美比外在美更重要，但實際上，首先看到的永遠是外在美，總不能要求別人第一眼就看到你內在綻放的美吧。女士化妝，看起來漂亮自信，有何不可？

有天與一位男友人阿民路過化妝品牌專櫃看了一會，他口痕地問：「咁多樣野同一時間搽上塊面，會唔會有化學反應爆炸嫁？」
面對如此具啟發性的提問，我保持克制，逐一產品解釋。「Base係打底，分唔同部位搽，T位用控油，面珠要有保濕既；仲有分顏色：紫藍針對偏黃皮膚、綠色針對偏紅皮膚、粉紅針對暗啞皮膚、膚色均勻的用珍珠白，提升光澤感。」
「哈哈，嘩，要我日日撻咁多野0係塊面度，我會自己爆炸先。我剩係知防曬有咩SPF+++」

「係呀，Foundation有埋防曬，一般出街SPF30++都夠，如果要提升輪廓，就要用不同深淺度粉底，凸出的地方好似鼻、眼肚、面珠就要用淺色，想瘦面就下巴U型位搽深色。之後就要上碎粉定妝，打底就完成啦。」







都仲係講緊打底，阿民開始後悔為了要作弄我而問的一個問題，試圖轉移話題：「好似你咁靚就唔駛化啦!」

「但係我今日有化妝喎!」
阿民試圖補鑊：「咁真係會爆炸，靚爆鏡呀!」
「係咩? (算數啦，甜笑中) by the way 你今日個頭都幾好睇。 」
阿民的注意力立即轉到櫥窗的那面鏡，用手指掐了頭髮數下，「邊係呀，頭髮長晒，要去剪頭髮。」
「又剪？你上兩個禮拜先剪完。」
阿民反應有點大，「吓? 頭髮生得好快呀，打橫生晒出黎，好大陸喎，即係約髮型師聽日剪，順便買髮泥。」

「頭先唔係買左支spray咩？髮泥咪又係定型，仲有你支gel呢？成支都冇點用過。」

題外話：我的化妝品。(真實圖片，拍照前略略執過)

阿民立即興致勃勃，「髮泥係要做個layer，觸感唔會好似髮膠同髮蠟咁黏膩，同埋做個啞致感，其實之前仲要0係髮根噴鹽水，令頭髮冇咁扁同塌，gel依家唔興啦，令立立咁，梳all back或者有用，spray就finish時候薄薄噴幾下，咪好似你用碎粉咁囉，層粉掃左同冇掃都唔知。」

「Fine! 學野又學得幾快，其實你個頭都洗唔少錢，我剪髮三個月先一次，你就一個月兩次，仲有你咁多整頭一支二支，仲有你支洗頭水成三舊水! 你依家條髮線高左咁多，遲d要買脫髮療程仲金。」阿民沉默了。

記住，凡事切忌太重手

其實，不論男女都要dress up! 不只是為了要討好別人，換個角度看，是要討好自己、相信自己、愛自己，花少少時間欣賞自己非常重要。每天起床梳洗後，望著鏡子裡精神奕奕的樣子，加一個微笑，為每一天來一個好開始。

一個光芒四射的人，光源來自信心。